حبيبتى فى الحلال ....لسا ما قابلتهاش ..ماشفتهاش..ماعيشتهاش
بس حاسس بيها ..باتنفس هواها وقلبها عايش معايا
كل يوم باكلمها ..باشاغلها..باحكيلها..وانا لسا معرفهاش
لو عينى ماشافتكيش...قلبى حاسسك
لو روحى ما قابلتكيش..قلبى بينبض باسمك
عمرى واقف مش هيكمل غير يوم لقائكى
يوم ميلادى هيجى يوم ما عينى تيجى فى عينيكى
واحس براحة وحب وامان
انتى منى وانا مش هاكون غير ليكى
هقابلك واشوفك واتبهر بيكى
وروحى هتطلع منى هتسكن معاكى
هتخاف عليكى وتحميكى وتقول يارب احفظها
يارب خد منى واديها
مستقبلنا هيبقى واحد ...حياتنا هتبقى جنة
الكلام دة مكتوبلك وانا حتى معرفش شكلك
بس لما اشوفك هيترسم فى قلبى
معرفش اسمك
بس لما اعرفة هيكون اجمل اسم بانطقة
عارفك هادية وراسية وعاقلة ...وكل حاجة فيكى زى مابتمناها
مجنونة فى حبك..حنينة فى طيبتك ..كبيرة بعقلك
كل حاجة فيكى احلى من التانية
مايتشبعش منها..ومش موجودة عند اى واحدة تانية
باقول يارب اكون زى مانتى عايزانى
واقدر اأسر هواكى ..واسرق قلبك ..واملك حياتك
مش عارف دلوقتى انتى عاملة اية
مستنيانى زى مانا مستنيكى ولا اية
بتحبينى ولا بتفكرى فى غيرى
حبيتى قبلى واتعلمتى ولا انا اول حب
انتى فين ..انتى اية ..انتى لية ..انتى ازاى
كلمة بحبك مخنوقة جوايا عايزة تروح لصاحبتها
مسيرى هعرفك والا قيكى وسط زحمة الناس
بس يارب تحسى بيا ويتلاقى الأحساس
دى اللحظة اللى هاتولد فيها
بعدك عنى من يوم ما اتولدت ...عرفنى انى ماقدرش اعيش من غيرك
بتوحشينى من قبل ما اشوفك ..امال لما تملكينى هتعملى فيا اية
نفسى اعيش معاكى ...روحى تسكن هواكى
شفت كتير وقليل ...ماحسيتش حاجة ولا ناوى أميل
احساسى مش ميت ..احساسى ليكى انتى وبس
مكتوب بأسمك ومخلوق ليكى
بحبك وهاوريلك كل كلمة كتبتهالك من قبل ما اشوفك
وانا حاسس بيكى دلوقتى وخايف يتاخر ميعاد لقانا
بس كل ثانية من غيرك عايشها لوحدى ..باعرف قيمتك وبيزيد حبى ليكى
زهقت من الوحدة ..مليت من الخوف
عايز اتطمن معاكى واعيش فى امان
دة الثانية فى بعدك تسوى سنين كتير حرمان
اهرب من الدنيا كلها واجيلك ..يا بر الأمان
أة لو تعرفى اللى فيا ...أة من اللى صابنى
املى فيكى مش هيموت ..يا مالكة روحى وقلبى فى سكوت
حبك اعنف انواع الحب ..واهداها لما يكون مطلوب
باغير عليكى ..بخاف عليكى ..مشتاق لنظرة عينيكى
بادعيلك من دلوقتى تكونى احسن منى
بادعيلنا نسهر ليالى كتير ونعوض حب سنين
بادعيلى ربنا يصبر قلبى ويحافظ عليكى
خلى بالك من روحك
ولو زهقتى كلمينى وانا هاحسك
زى مانا سامعك ..شايفك ..حاسس دقات قلبك
وعارف انك مستنيانى ومحافظة على نفسك
لو زعلانة هونى على نفسك ...مالناش غير بعض
من دلوقتى خايف عليكى
باول ربنا يطمننى عليكى
بيكى هابقى كل حاجة ..ومن غيرك ولا حاجة
بافرح لفرحك ..باحزن لحزنك ..باشتاق لشوقك ..باقلق لقلقك
حبى ليكى من غير قيود ..وصبرى لحد مالقاكى مالوش حدود
ياعمرى الجاى والحاضر ..اللى هاعيشة واحبة واموت معاة
عايز لحظة لقانا تيجى واشوفك و أملى عينى منك
فراقنا هو الموت ..ومش هيعلى علية اى صوت
ياللى علمتينى ان الحب مش بس حرفين
علمتينى ان الحب بيتولد وبنشتاق الية من قبل ما يتوجد
من دلوقتنى باعشق تفاصيلك ..بحب كل حاجة فيكى
جاليك وهتجينى ..هاعوضك حب وهتعوضينى
يا اغلى ما هتشوف عينى
بحبـــــــــــــــــــــــــــــــــــــــــــــــ ـــــــــــك وبيننا ميعاد
----------------------------------------------------------------
كلامى مش منظم ..ومش مرتبط بسجع وقافية ووزن وصينية مسقعة بتنجان كتير ..بشاميل قليل
بس انا واثق ان هى حاساة وان شاء الله لما اقابلها هاوريها الكلام دة
واقولها شوفى انتى عملتى فيا اية : )
تشجيعكو ليا وحبكو اللى فى الردود هو اللى نمى احساسى وادانى ثقة فى نفسى
باكرة المجاملات اللى بيتبنى عليها حاجات كتير وتتهد فجأة علشان اساسها مش صح
لو حد حابب يحكم او يتكلم يتفضل
الكلام فى الأصل ما بينى ومابين نفسى لحد عايش جوايا و معرفوش
اصعب احساس فى الدنيا ..انك تنشغل 24 ساعة هى بتعمل اية دلوقتى وعايشة فين ومبسوطة ولا فى حاجة مضايقاها
بس بردو الأحساس دة هو الدافع اللى بيغريك تبقى احسن واحد فى الدنيا علشان تملى عينيها وتليق بيها
اللى من غيرة فعلا كل التعب اللى بتتعبة واى حاجة حلوة فى حياتك مالهاش معنى
علشان ماتجننش كتبت التوبيك دة لكل اخواتى ..قلت يمكن حد عندة نفس حالتى
ربنا مايحرمنا من بعض ..مستنى رايكو بامانة لكل اللى قرى الخاطرة شطر شطر
الأحد مايو 25, 2008 12:33 pm
